ПУШКИНЫ ФÆЗ МÆСКУЫЙЫ

Хъызыд. Мæ хуыздæр цин — дæу фенын,

Нæ алвæрсты тыфылтæ калдта уад.

Нæ цуры та лæууыд уырыссаг гени

Йæ пæлæзы — уæнгуагъд æмæ æнкъард.

Цыдтæ мæнæй. Цæссыгамæхст — дæ цæсгом...

Цæуыл ма дзурæм, уый бæрæг нæ уыд:

У не ‘намондыл дун-дуне æвæсмон,

Нæ амондыл, бæгуы, нæ цыди дзырд.

Æмбæрстон æй: фæсвæд ныхæстæ, хахуыр,

Дæу баййардтой. Цы уыд мæ бон зæгъын! —

У а хъуыддаг нæ адæмтæн сæ ахуыр,

Сæ къахайстау ыл нал хъуыды кæнынц.

Æмæ хъызыд. Рæхуыста уад йæ арцæй.

Бæрзонд поэт хъуыдыдзастæй лæууыд.

Нæ зыдтон æз, кæмæн нæ кодта уайдзæф

Дæуæй, мæнæй? — Фæлæ цы уыд, уый уыд!

Мæнæй та уæд уыди æппæтдæр рохы,

Поэт лæгмар куы нæ вæййы, бæргæ,

Фæлæ цыдтæн дæ хорзы номыл тохмæ —

Цæргæ уа йе — мæлгæ!

2. АЛАНТÆ

Æрдз нызмæлыд фæдисхъæрæй, —

Дурты расхуыста хох, —

Уый алантæ сæ хистæрæй

Сидтау айхъуыстой: тох!

«Тох! Тох!» — азæлыд быдырты,

Кæрдтæ ферттывтой рог,

Тагъд ызнæгты сæркъуыдыртыл

Калдзæн рухс цæссыг бон.

Æмæ фесхуыстой хуссæртты:

«Лæуу фæстæдæр, æрдхорд!»

Зæхх сын фехсы сæ дугъæтты,

Стæй сæ ацахсы ног.

Гъæтт, кæдæм тырныс, сахъ хæстон,

Нæу дын уа-зынаргъ цард? —

Уæд дæ хибар, æнкъард къæсы

Чи ыссудздзæнис арт?..

Хивæнд — уый у æрвондзæдис,

Сахъ иронæн — йæ фæтк...

Цас поэттæ ныццагъды ис

Уыцы сау хæсты уæд!

Ныр дæ кой дæр куы нал хъуысы,

О мæ фыдæл, мæ туг!

Æви афтæ дæ сау къæсыл

Хинæй разылди дуг?..

3. ПУШКИНМÆ

Ужасная судьба отца и сына —
Жить розно и в разлуке умереть.

М. Ю. Лермонтов

Æз дæ карæй фæхистæр дæн,

Фарн дæм бадзурæд, цардхæрæфырт! —

Ныр мæрдтыбæсты диссагæн



(Уый нæ зыдтай) мæ дзырд

Ды кæсдзынæ... Ехх, барджынау,

Цæссыг ахсы мæ хъуыр:

О, ирон туджы дадзинтæ,

О, нæ уды мæгуыр!

Дуне афтæ æвæлмон у:

Амонд — цæхх æмæ дзул!..

Нал фыд зоны йæ хъæбулы,

Нал йæ фыды — хъæбул.

Иунæг туг ма нæ фæцуды,

У историйæн куырд.

Байрай, гъе уæдæ, сау лæппу,

Уаз ирон мады фырт!


4788485732920321.html
4788505166549567.html
    PR.RU™